နာဆာနောက်ဆုံးတွေ့မယ့် ကမ္ဘာ

နာဆာနောက်ဆုံးတွေ့မယ့် ကမ္ဘာ

လွန်ခဲ့သော နှစ် သန်းပေါင်း၁သောင်း၃ထောင်

မဟာပေါက်ကွဲမှုသီဝရီ စကြ၀ဠာဆင့်ကဲဖြစ်စဉ် ထဲကမှ

ဂြိုလ်ကြီး ဂြိုလ်ငယ် ဂြိုလ်သိမ် ဂြိုလ်မွှား အစိတ်အစိတ်အမွှာ ထဲကမှ

နဂါးငွေ့တန်းဂလက်ဆီ ထဲကမှ

နေအဖွဲ့အစည်း ထဲကမှ

သက်ရှိမျိုးနွယ်ကမ္ဘာ။

ဦးခေါင်းဆံစ မီးစွဲလောင်မှု ငြိမ်းသတ်ဖို့ ချက်ချင်းလိုအပ်သလို အနာဂါတ်ကမ္ဘာ အတွက် အရေးပေါ်ကိစ္စ

အလင်းနှစ် သန်းပေါင်းများစွာအထိ ပို့လွှတ် ရေဒီယိုအချက်ပြ အသံလှိုင်းများ သက်ရောက် တုန့်ပြန်မှု ရှိ မရှိ

ထောက်လှမ်းရေးဂြိုလ်တုများ လွန်းပျံယဉ်များ အာကာသသုတေသနများ အချိန်နှင့်တပြေးညီသတင်းပေးပို့ချက်များ

၏အစီအရင်ခံစာ။

စကြ၀ဠာထဲကို ခရီးမဆန့်ရင်လူသားမျိုးနွယ်ဟာ နောင်နှစ် ထောင်ပေါင်းများစွာ ရှင်သန်ဖို့မဖြစ်နိုင်တော့

အာကာသထဲမှာ နယ်မြေသစ်တွေ ရှာဖွေဖို့သာ တစ်ခုတည်းသောမျှော်လင့်ချက်ဖြစ်သည်။

(စတီဗင်ဟော့ကင်း၊ ၂၁ရာစု အာကာသစူးစမ်းလေ့လာရေးပညာရှင်)

နဂါးငွေ့တန်းဂလက်ဆီကောက်ရိုးပုံထဲ သက်ရှိတွေနေထိုင်နိုင်မယ့် ဂြိုလ်ကမ္ဘာအပ် ရှာပုံတော်စစ်ဆင်ရေး

နာဆာဟာ နေအဖွဲ့အစည်းအသစ်တွေကိုရှာ

ဟက်ဘစ်တေဘယ်လ်ဇုံတွေရှာ

 ဂြိုလ်တွေကိုရှာ

 ဂြိုလ်ရံလတွေကိုရှာ

ဥက္ကာခဲ ဥက္ကာပျံတွေကိုရှာ

ကယ်ပလာတယ်လီစကုတ်ထဲ ၀င်လာသမျှကို ရှာ။

ကပ်ရောဂါဆန်းမျိုးစုံအမြစ်တွယ်စွဲငြိနေတဲ့ နာတာရှည် ဒီကမ္ဘာကိုထားခဲ့ဖို့

စိတ္တလူသတ်သမားရဲ့ အနုမြူစက်ကွင်းထဲက ဒီကမ္ဘာကြီးကို ထားခဲ့ဖို့

အနံ့အသက် အစွန်းအထင်း အဖာအထေးတွေနဲ့ ကမ္ဘာအဟောင်းကြီးကို ထားခဲ့ဖို့..

နည်းပညာ စိတ်ကြွဆေးစွဲနေတဲ့ ဒီကမ္ဘာမြေကို ထားခဲ့ဖို့

နာဆာဟာနေအဖွဲ့အစည်းအသစ်တွေကိုရှာ

ဖေါက်လွှဲဖေါက်ပြန်ဂေဟစနစ်နဲ့ ကိုယ်ပူရှိန်တညီးညီးတက်နေတဲ့ ဒီကမ္ဘာဟောင်းကို ထားခဲ့ဖို့

သံဝေဂတွေ သံသယတွေချည်း သံသရာလည်နေတဲ့ ဒီကမ္ဘာကို ထားခဲ့ဖို့၊

အယူဝါဒ၊ ဘာသာ နဲ့ မိရိုးဖလာ ကြပ်ခိုးမှိုင်းစွဲကမ္ဘာမြေကြီးကိုထားခဲ့ဖို့

တစ်ခေတ်ပြီးတစ်ခေတ် ဆက်တိုက်နစ်နေတဲ့ ကမ္ဘာကြီးကိုထားခဲ့ဖို့

နာဆာဟာ ဟက်ဘစ်တေဘယ်လ်ဇုံတွေရှာ

ပထမကမ္ဘာ၊ ဒုတိယကမ္ဘာ၊ ဆင်းရဲမွဲတေမှု ချောက်ကမ်းပါးထဲက တတိယကမ္ဘာ ကမ္ဘာမှန်သမျှကို ထားခဲ့ဖို့

အတုအယောင်ငြိမ်းချမ်းရေးနဲ့ ကမ္ဘာမြေကိုထားခဲ့ဖို့

ကိုယ့်ဇာတ်ကိုယ်မနိုင်တော့တဲ့ ကမ္ဘာအဟောင်းကြီးကိုထားခဲ့ဖို့

လောကပါလနတ် လက်မှိုင်ချနေရတဲ့ ဟောဒီ့ကမ္ဘာကိုထားခဲ့ဖို့

နာဆာဟာ ဂြိုလ်တွေကိုရှာ ဂြိုလ်ရံလတွေကိုရှာ ဥက္ကာခဲ ဥက္ကာပျံတွေကိုရှာ

အကွက်ဆင်ရင်း အကွက်ရွှေ့ရင်း ကိုယ်တိုင်ချောင်ပိတ်မိနေတဲ့ ကမ္ဘာမြေကြီးကိုထားခဲ့ဖို့

ခေတ်ပျက်သူရဲကောင်းတွေများလွန်းနေတဲ့ ကမ္ဘာကိုထားခဲ့ဖို့

သဲတရှပ်ရှပ် အဆီတ၀င်းဝင်း ဒီကမ္ဘာမြေကိုထားခဲ့ဖို့

မျက်ရည်တွေ သွေးတွေ ကျောက်ဖြစ်ရုပ်ကြွင်းဖြစ်နေတဲ့ ကမ္ဘာကြီးကိုထားခဲ့ဖို့

နာဆာဟာ ကယ်ပလာတယ်လီစကုတ်ထဲ ၀င်လာသမျှကို ရှာ

(((အကုန်အစင်မော့သောက်ထားပြီးသား ဗူးခွံတစ်ခုကို ခြေမွှကန်ကျောက်ပစ်လိုက်သလို

ဟောဒီ့ ကမ္ဘာအဟောင်းအမြင်းကြီးကို ပစ်ထားရစ်ကြစို့…။)))

နောင်မျိုးဆက်များစွာ အတွက် တစ်ခုတည်းသော နောအေး

စကြ၀ဠာ အမှတ်တံဆိပ် အထွဋ်အထိပ်သော သရဖူ  

နာဆာ ချိန်ရွယ်ပစ်ခတ်တဲ့ အောင်မြင်မှု စက်ဝိုင်းအလည်ဗဟို၊

နယ်ပယ်သစ်ချဲ့ထွင်ရာမှာ သိပ်လက်ယဉ်တဲ့ လူသားအဟောင်းတွေ အတွက်

စစ်ပွဲအတွေ့အကြုံတွေ ရင့်ကျက်တဲ့ လူသားအဟောင်းတွေ အတွက်

လူသတ်လက်နက်တီထွင်ရာမှာ ပြောင်မြောက်တဲ့ လူသားအဟောင်းတွေ အတွက်

 ဒီ့ထက် ဆန်းကြယ်စရာမရှိတော့တဲ့ အတွေ့သစ် အကြုံသစ် စွန့်စားခြင်းအသစ် ရင်ခုန်လှုပ်ရှားမှုအသစ်

KOI172.02မှအစ Kepler-62f,e တွေမှအစ အလင်းနှစ် ၁၃နှစ်အကွာက သက်ရှိဖြစ်ထွန်းနိုင်ချေရှိ ကမ္ဘာ့ကိုယ်ခွဲအမွှာများ

အဲဒီ့ ကမ္ဘာအသစ်ကို ဟောဒီ့ကမ္ဘာအဟောင်းက  တန်းမြင့် နည်းပညာနှင့် စစ်ကြေငြာမယ့်တော့မယ်။      ။

အိန္ဒြာ

(၂၊၂၊၂၀၁၃ - ၁၄၊၄၊၂၀၁၃)

ခဏနေ ကျွန်မ ပြန်ခဲ့မယ်…

ခဏနေ ကျွန်မ ပြန်ခဲ့မယ်…


အဲဒီ့ မျက်ဝန်းအကြည့်တွေနဲ့ ကျွန်မကို လာလာ မရှို့ပါနဲ့..။
ကျွန်မကို တစ်ယောက်တည်း ထားခဲ့ကြပါလား။
ခဏနေ ကျွန်မပြန်ခဲ့မယ်။

ကျွန်မရင်သားတွေ တောင့်တင်းလာပြီဆို…
ဆောက်တည်ရာမရခြင်းတွေထဲ ကျွန်မဘယ်လို ပျက်ကျ သွားသလဲ
ကျွန်မရဲ့ ရိုးတွင်းချဉ်ဆီတွေ ဘယ်လိုအငွ့ပျံကုန်သလဲ
ကျွန်မစိတ်တွေ ဘယ်လောက် လှိုင်းကြီးလေထန်လဲ….
အို…ရှင်မသိနိုင်ပါဘူး..
ရှင်ဟာ ယောကျာ်း တစ်ယောက်ဖြစ်တဲ့ အတွက် ကျွန်မကို အစအဆုံး မဖတ်နိုင်ပါဘူး။
ရှင်ဟာ အဖေ တစ်ယောက် ဖြစ်တဲ့အတွက် အမေတွေကို မကျေညက်နိုင်ပါဘူး။
ရှင် မစိုးရိမ်ပါနဲ့ ၊ ခဏနေ ကျွန်မပြန်ခဲ့မယ်။

ကျွန်မ၀မ်းကြာတိုက်ကနေ အနန္တစကြဝဠာအဆုံး ‘သ’ူ ရနံ့လေး မွှေးမြနေခဲ့တယ်။
သူ့ ပထမဆုံး နှလုံး ခုန်သံကနေ ကျွန်မ နောက်ဆုံးထွက်သက်အထိ ‘သူ’ဂီတလေး သာယာနေခဲ့တယ်။
ကျွန်မ အိပ်မက်ရဲ့ အစ အလည် အဆုံး ကလည်း သူပါပဲ
ကျွန်မ မျှော်လင့်ခြင်းမီးရှုးတန်ဆောင်လေးကလည်း သူပါပဲ။
ခုတော့  ကျွန်မအနာဂါတ် စိုက်ခင်းဟာကျွန်မရဲ့သားအိမ်လို ဟာလာဟင်းလင်းကြီးတဲ့..။

ကျွန်မတီးခတ်နေတဲ့ဘ၀က ဘယ်လိုအသံထွက်မျိုးပါလိမ့်..
ကျွန်မ သွေးသားတွေ လျှံကျ လျောပျက်သွားစေတဲ့ ဓါတ်သတ္တုက ဘာပါလိမ့်..
ကျွန်မအမည်ပေါက် ကံကြမ္မာက တကယ့်ကို လွင်တီးခေါင်ပြင်ပါ..
ကျွန်မ အရူးမီးဝိုင်းပါ။ ဒီအဖြေတွေအားလုံးကို ကျွန်မလိုအပ်တယ်။

ကျွန်မ ဝိညာဉ်တွေတဆုံး အသံကုန် ဟစ်အော်ချင်လာရင် 
ကျွန်မ သွေးကြောမျှင်တွေက အစွမ်းကုန် ရှိုက်ငင် ချင်လာရင်
ကျွန်မ သူ့အတွက်ပုခက်ကလေးကို ငြင်ငြင်သာသာလေးလွှဲနေမယ်
ကြည်ပြာရောင် တွန်းလှည်းလေးကို တစ်ယောက်တည်း တွန်းချင်တွန်းနေမယ်
သီချင်းလေးတွေလည်း တိုးတိုးဖွဖွ ညည်းဦးမယ်
သိုးမွှေး ခြေအိပ်ပန်းရောင်လေးကို အပြီးသတ် ချည်ငင်နေလိုက်မယ်
ဟိုးမားရဲ့ နတ်ဘုရားပုံပြင်တွေ ကျွန်မ ရေရွတ်လိုက်ဦးမယ်
ကျွန်မဘယ်တုန်းကမှ ချော့မြှူခွင့်မရခဲ့တဲ့ ထွက်ပြူစ ရှေ့သွားလေးတွေကိုပုံတူရေးချင် ရေး နေမယ်..

မေမေက မင်း တစ်စင်တီမီတာချင်း ကြီးထွားလာတာကို တစိမ့်စိမ့် ကြည်နူးခဲ့သူပါ။
မမေက မင်း အရိပ် အငွေ့လေးနဲ့တင် တစ်ကမ္ဘာတည်နိုင်ခဲ့သူပါ။
 မေမေက…။ …မေမေ..က …။ မေ…မေ..က…။ရှင် မစိုးရိမ်ပါနဲ့ ခဏနေ ကျွန်မပြန်ခဲ့မယ်။

အိန္ဒြာ
(15/2/2013)
စတိုင်သစ်မဂ္ဂဇင်း (April'2013)

တစ်ထောက်နားပြီး လှည့်ပြန်

အညောင်းပြေ အညာပြေ ခြေဆန့်လက်ဆန့်ရွှေအိုရောင် မဟုတ်တော့လည်း ဖက်ဖူးရောင်

မဟုတ်တော့လည်း ကြည်ပြာရောင် ညနေခင်း ပန်းနံ့လေညှင်း တသင်းပျံ့ပျံ့ တိမ်တွေပျံလာတာ

မော့ကြည့်လို့ သီချင်းဆို ရေချိုးခန်းထဲ ရေဘုံပိုင်းခေါင်းဖွင့်ပြီးငိုတဲ့အခါတွေလည်း ငို အညောင်းပြေ

အညာပြေ ခြေဆန့်လက်ဆန့်  ဆွဲဆောင်ညှို့ငင်နိုင်မှုအပြည့် ကြော်ငြာဘုတ်ဘီလ် မထီတရီ ပြီတီတီ

အီစီကလီ သုံးဘက်မြင် မူဗွီ အတွေး တစ်ချက်ငေး ဟိုငေး ဒီငေး အစင်းလေး အကွက်ကလေး

မဟုတ်တော့လည်း နှစ်ဆယ့်သုံး နှစ်ပိုင်းတစ်ပိုင်း ဒီဂရီ အစောင်း အစောင်းလေးဖြစ်ဖြစ်ပေါ့

နောက်ဆုံးပေါ်ဆံပင်ပုံပေါ် ဦးထုတ်တစ်လုံးပစ်တင်နောက်တော့ ဂူချီမျက်မှန်သားအောက်မှာ

အကြည့်တွေကို လှောင်ထား နောက်တော့ဂျင်းဘောင်းဘီထဲလက်နှိုက် ပလက်ဖောင်းဘေးကနေ

သွားမလား ကျည်ဆံရထားနဲ့ သွားမလား နှစ်ထပ်ကားနဲ့သွားမလား မရောက်သေးဘူးလား

မရောက်သေးရင်ရောက်အောင်သွား ရောက်ပြီးရင်တစ်ထောက်နား. အသည်းပုံအမြှုတ်လေး

တွေကိုအသည်း တယားယား ကစား အကြည့်ချင်း ၀ိုးဝန်း တိုးတိုက် တလှိုက်လှဲလှဲ အညောင်းပြေ

အညာပြေ ခြေဆန့်လက်ဆန့် အဖန် ဒါမှမဟုတ် ချဉ်တင်တင် မဟုတ်လည်း အခါးလေး ပဲပေါ့ ကွာ

အိန္ဒြာ

(၁၂.၇.၂၀၁၁)

CASHIER

တစိမ့်စိမ့်တွေးပြီး တဖြည်းဖြည်းရွံရှာလာ ၊ မသဒီစိတ်များ တဝေါဝေါဆန်တက်လာ

စိတ်ထဲကနေ တစ်စစ်စစ်ယားယံလာ ၊ ဘာတွေများစွဲမြဲထင်ကျန်နေရစ်မလဲ

ဘယ်အရာတွေနဲ့ ထိစပ်ပတ်သတ်ခဲ့မလဲ ဘယ်လိုပိုးမွှားတွေများ တွယ်ငြိကပ်ပါလာမလဲ

သူ့မှာစွန်းထင်းပေရေနေတာ ချွေးစက်တွေမှ ဟုတ်ရဲ့လား. သူမှာ နံစော်နေတာ သမ္မာအာဇီဝမှဟုတ်ရဲ့လား

သူဘယ်ကနေ ရောက်လာသလဲ သူဘာတွေ ဖြတ်သန်းလာခဲ့လဲ သူ့သမိုင်းကြောင်းက ဘာတွေလဲ

သမ္မတရဲ့သက်တော်စောင့်ဆီကလား၊ ၀ါးဆစ်ဗုံသံလေးရှေ့က သတ္တုရောင် ပိန်ချိုင့်ချိုင့်ခွက်တစ်လုံးထဲကလား

ပင်စင်စားဆရာအိုကြီးရဲ့ခြံစောင့်ကြော်ငြာဆီကလား၊ ကဒါဖီရဲ့ ဘဏ္ဍာတော်တိုက်ဆီကလား

သူဟာ ကံကံ၏အကျိုးဆီကလား ဘုရားသခင်ရဲ့ အလိုတော်ကျလား အလ္လာအရှင်မြတ်ရဲ့ ဂုဏ်ကျေးဇူးတော်လား

သူဘယ်ကနေလာသလဲ ၊ သူ နောက်ကြောင်းရှင်းရဲ့လား ၊ သူလိပ်ပြာလုံရဲ့လား ၊ သူ့မှာ စွဲထင်နေတာဘာနံ့လဲ

သူ စတိဖ်ရဲ့ နောက်ဆုံးပေါ်ပန်းသီးဆီကလာသလား ၊ လေဒီဂါဂါရဲ့ အတွင်းခံထဲက လာသလား

ရင်လတ်ရဲ့ရေဘေးဒုက္ခသည်တွေဆီကလား ၊ ကင်ဂျုံအီရဲ့ အနုမြူဈေးကွက်ထဲကလား၊

သူဘယ်လောက်နွမ်းနယ်နေပြီလဲ သူဘယ်လောက်မှားယွင်းခဲ့ပြီးပြီလဲ သူဘာတွေလဲလှယ်ယူခဲ့လဲ

သူ့မာကျောမှုအဆင့်က ဘယ်လောက်လဲ သူဖောင်းပွမှုနှုန်းဟာ ဘယ်လောက်မြန်ဆန်လဲ

သူဟာ လောင်းကြေးလား သူဟာဒဏ်ကြေးလား သူဟာလာဘ်လာဘလား သူဟာအလျော်အစားလား သူဟာ အတိုးနှုန်းလား

သူ့အသားအရည်က ဘာရောင်လဲ သူဘာယောင်ဆောင်လာခဲ့တာလဲ ၊ သူဟာ ဘာသာစကားဘယ်နှစ်မျိုးလောက်တတ်သလဲ

သူ ဘယ်ကနေရောက်လာသလဲ ၊ G20 ရဲ့ လျို့ဝှက်အစည်းဝေးဆီကလား ၊ အသေခံဗုံးခွဲသမားရဲ့ သေတမ်းစာဆီကလား ၊

ဆောင်ကြာမြိုင်ထဲက ရယ်သံချွဲချွှဲတွေဆီကလား ၊ အထည်ချုပ်သမလေးရဲ့ နေ့ဖို့ညစာဆီကလား ၊

မျက်ရည်ပေါက်ကြီးငယ်တွေဆီကလား ၊ အခွန်တော်တွေဆီကလား၊ သဘာဝအရင်းအမြစ်တွေဆီကလား၊

ကရုဏာကြေးတွေဆီကလား တစ်ဖက်သတ်စာချုပ်တွေဆီကလား လူမှုထောက်ပံ့ရေး အသင်းအဖွဲ့တွေဆီကလား

ဘယ်ကလာသလဲ ဘယ်ကိုသွားမှာလဲ ဘယ်အထိရောက်ခဲ့သလဲ ဘယ်လိုရှေ့ဆက်မလဲ သူ့မှာ စွဲထင်နေတာဘာတွေလဲ

တစိမ့်စိမ့်တွေးပြီး တဖြည်းဖြည်း ရွှံရှာလာ မသဒီစိတ်များဝေါဝေါဆန်တက်လာ နမ်းကြည့်ရင် ဘာနံ့ရနေလိမ့်မလဲ

စိတ်ကနေစပြီး ယားယံလာ ၊ လက်ဖ၀ါးတွေပါတစစ်စစ် ယားယံလာ ၊ တစ်ဘ၀လုံးလုံး အဆက်မပြတ် ယားယံလာ….

အိန္ဒြာ

(၁၁.၁၁.၁၁)

( 2012 ဇန်န၀ါရီထုတ် ပိတောက်ပွင့်သစ် မဂဇင်း)

အရေးပေါ်ကိစ္စ

၂၀၁၁ ကို ဒီကဗျာနဲ့ အဆုံးသတ်လိုက်ရတာ စိတ်မကောင်းစရာပါပဲ။

အရေးပေါ်ကိစ္စအားလုံးကိုလည်း ဒီကဗျာနဲ့ အဆုံးသတ်လိုက်ချင်ပါတယ်။

၂၉ ရက်နေ့မှာဖြစ်ခဲ့တဲ့ ပုဇွန်တောင်ပေါက်ကွဲမှုကိစ္စဟာ ၂၀၁၁ ကို ထွက်ခတ်ခတ်သွားခဲ့ပါတယ်။

ဒီလို အဖြစ်အပျက်မျိုးတွေ မပြီးပျောက်နိုင်သေးဘူးလား..။ ဒီလိုမျိုး သေကြေကြရတဲ့ အသက်တွေ ဘယ်လောက်များနေခဲ့ပြီလဲ..။

ဘယ်တော့မှ အဆုံးသတ်နိုင်မှာလဲ...

၂၀၁၂ ကစပြီး ဗမာပြည်ကြီး ငြိမ်းချမ်းပါစေ။ ကမ္ဘာကြီး ငြိမ်းချမ်းပါစေ။

အားလုံးနှစ်သစ်မှာ သတင်းကောင်းအသစ်တွေသာကြားရမြင်ရကြပါစေ။

မင်္ဂလာရှိသော သတင်း စာမျက်နှာတွေသာဖြစ်ပါစေ။

++++++++++++++++++++++++++++++++++++++++++++++++

အရေးပေါ်ကိစ္စ

ဥသြသံ

ခေါင်းလောင်းသံ

အချက်ပြ မီးနီ ကတိုက်ကရိုက် မိုင်ကုန်ဖွင့် မောင်းနှင်သံ

ရဟတ်ယဉ်ပန်ကာဒလက်လည်သံ

ရုတ်တရက် ဘရိတ်ဆွဲလိုက်တဲ့ အသံ

ဝရုန်းသုန်းကား အပြေးအလွှားခြေသံ

မြင်ကွင်းတစ်ခု ပွက်ပွက်ဆူနေသံ

သွေးရူးသွေးတန်းဟစ်အော်မြည်ကျွေးသံ

ဘာမှ ထွက်မကျလာနိုင်တော့တဲ့ အသံ

ခနာကိုယ်အစိပ်အပိုင်းတစ်ခု ပြတ်တောက်လွင့်စင်သွားလိုက်သံ

အငမ်းမရ အသက်ရှုသံ

သွေးတပွက်ပွက်ယိုစည်းကျနေသံ

တွဲလက်တွေ ပြုတ်ထွက်သွားတဲ့ အသံ

အစွမ်းကုန် မွန်းကြပ်မှောင်မိုက်နေတဲ့ အသံ

မျှော်လင့်ချက်ကျကွဲသွားတဲ့ အသံ

အနာဂါတ်စုံးစုံးမြုတ်သွားသံ

နှလုံးအိမ်တွေ တဖျစ်ဖျစ် ကျွမ်းမြိုက်တောက်လောင်နေတဲ့ အသံ

ဖလက်မီးပွင့်သွားတဲ့ အသံ

ရီကော်ဒါ ခလုပ်နိုပ်လိုက်သံ

ဂြိုလ်တုမှ လိုက်ဖ်ရှိုး ရိုက်ကူးထုတ်လုပ်ရေး ယန္တရားသံ

အဆင့်ဆင့်သောနည်းပညာတွေ တည်းဖြတ်ကူးဆက်နေတဲ့အသံ

ကာကွယ်ရေး ပညာပေးအစီအစဉ် ဖတ်ကြား သွန်သင်သံ

အဆင့်ဆင့် အမိန့်အရ တပ်လှန့်နိုးဆော်သံ

မျက်ရည်များ ဆုတောင်းများ စိတ်ထောင်းကိုယ်ကျေများ ရောနှောစီးဆင်းပျစ်ခဲသွားတဲ့ အသံ

ရိုးရာမပျက် သ၀ဏ်လွှာစေသံ

ကုလားထိုင်ရွှေ့သံ

ပေါင်မုန့်ကြား ဒိန်ခဲ ညှပ်လိုက်သံ

ရီမုကွန်ထရိုးကိုနှိပ်လိုက်သံ

သတင်းစာ တဖျတ်ဖျတ်လှန်နေသံ၊

အင်တာနင်ကွန်ယက်ချိတ်ဆက်သံ

ရုပ်မြင်သံကြားဖွင့်လိုက်သံ

ကော်ဖီတစ်ကျိုက်ကျိုက်လိုက်သံ

ကမ္ဘာတစ်ခြမ်းက ကမ္ဘာတစ်ခြမ်းကို စုတ်သတ်လိုက်တဲ့ အသံ။ ။

အိန္ဒြာ

( မဂ္ဂဇင်းမှာပါခဲ့ ကဗျာလေးတွေရယ် အသစ်နည်းနည်းရယ် စုပြီးလုပ်မယ့် "ကဗျာရေးသလိုလို" ဆိုတဲ့ ကဗျာစာအုပ်မှာ ပါမယ့်ကဗျာလေးပါ။ မတ်ခ်ျလလောက်မှာ နှစ်ကာလများက ထွက်ပါမယ်။ ဒီကဗျာကို ဂျပန်ဆူနာမီပြီးစက ရေးဖြစ်ထားပါတယ်)