တစ်နှစ်မှာ နှစ်သန်းခွဲ ၊ ဆယ့်နှစ်စက္ကန့်မှာ တစ်ယောက်နှုန်း ခြေသံ

ပိုစတာ(၁)။

ကယ်ရာမဲ့ တောင်းပန်တိုးလျှိုးသံ တစ်ကြောင်းဆွဲ စုတ်ချက်

မျက်သားပြာပြာလေးထဲ ဘာမှကို မကျန်ရှိတော့တဲ့ အနှုတ်လက္ခဏာ

အနာဂါတ်တွေ တိုးဖျော့တိမ်ဝင်သွားပုံ ဖိုးဂရောင်းနဲ့ ပိုးသားဂါဝန်မွမွလေး

နာကျင်ကြောက်ရွံ့ခြင်းများနဲ့  အထပ်ထပ်သေဆုံးခြင်း အသက်ဓါတ်

ဒီ့ထက် ပြာမိုက်စရာမရှိတော့တဲ့  ညထဲက နောက်ထပ်ညနက်ရဲ့ ပုံတူ..

၎ x အပျိုစင်

ငွေကြေးအမြောက်အများနဲ့ အပျိုစင်ညကို ဝယ်ယူကြ

အပျိုစင်ညနဲ့ ကံကောင်းခြင်းတွေကိုဝယ်ယူကြ

ကောင်းသတင်း ၊သားကောင်းရတနာ၊ လာဘ်လာဘနဲ့ ကြွယ်ဝချမ်းသာမှု…

ကံကောင်းခြင်းတွေက ဒါတွေအားလုံးကိုဆောင်ယူလာလိမ့်မယ်လို့..

သူတို့  တကယ့်ကို ယုံကြည်နေကြပေါ့..။

အခု အခန်းထဲမှာ ကျွန်မကို တစ်ညတာ ဝယ်ယူမယ့်

အမျိုးကောင်းသားကြီး ရောက်နေပြန်ပြီ

အသက်၁၀နှစ်အရွယ် အပျိုဖေါ်ဝင်ပြီဆိုတာနဲ့ ကျွန်မကို သူတို့ ရောင်းစားခဲ့ကြတာ..

တစ်ခါ ၊ နှစ်ခါ ၊ သုံးကြိမ် သုံးခါအထိ သူတို့ ဈေးကွက် သူတို့ စီမံချုပ်သီမှုနဲ့ ကျွန်မက အပျိုစင်ပါပဲ

အခုက…ကျွန်မရဲ့ ၄ ကြိမ်မြောက် အပျိုစင်ညဆိုပါတော့..။

(ကမ္ဘောဒီးယား အမျိုးသမီးငယ် ၊ကမ္ဘောဒီးယား)

ပိုစတာ(၂)။

မိစ္ဆာတွေ သွေးဆူနေသလိုမျိုး ပင်လယ်တစ်ခုလုံး လှိုင်းကြီးလေထန်

အချိန်မရွေး လေနီကြမ်းဆင်လာနိုင်သလို  အချိန်မရွေး ဘဝက နစ်မြုပ်သွားနိုင်တယ်

မာကျောတဲ့ မေးရိုးတွေထဲမှာ အားမတန်မှုတွေနဲ့

နာကြည်းမှုရုပ်သေထဲမှာ ပွက်ပွက်ဆူနေတဲ့ အသံတွေနဲ့

ကမ်းမရှိ  လမ်းမရှိ သလို အနာဂါတ်တွေ ဆိုတာလည်းမရှိဘူး..

အရုဏ်က သွေးဆမ်းထားသလို အနီရောင်နဲ့ ဖူးပွင့်လာပြန်ပြီ..

တစ္ဆေလုပ်သား

နယ်စပ်ရောက်တော့ ပွဲစားတွေက ကျွန်တော်တို့ယုံကြည်မှုတွေကို ဆုတ်ဖြဲပစ်လိုက်ကြ

သူတို့က ကျွန်တော်တို့ကို ခွေးတွေလို ဆက်ဆံကြတော့တယ်။

နှစ်ရှည်စာချုပ်၊ ငါးဖမ်းသင်္ဘောအစုတ်အပြတ်နဲ့

၃ လတစ်ကြိမ်တောင် ကမ်းပေါ်တက်ခွင့်မရှိတဲ့ လူသားငရဲ။

ပလပ်စတစ် အသက်ကယ်အင်္ကျီတစ်ထည်နဲ့ ကျွန်တော်..

ဘဝကို လောင်းကြေးထပ်ကြည့်လိုက်တဲ့ အခါ

လှေသူကြီးရဲ့ သေနတ်ပြောင်းဝမှာ ကျွန်တော့် ဝိဉာဉ်က တဆတ်ဆတ်တုန်ခါလို့

ကုန်းပတ်ပေါ်ကနေ  ကျွန်တော့်ကို ကန်ကျောက်ချ

စိတ်ရှိသလို ရိုက်နှက်ထိုးကြိတ်ပြီးတော့မှ ကျွန်တော့်ကို သော့ပိတ်လိုက်ကြတယ်..

ဘယ်သူမှ သတိမမှုမိတဲ့ တစ္ဆေတစ်ကောင်လို

မှောင်မှောင်မဲမဲ ကွန်တိန်နာတစ်လုံးထဲ

ရက်သတ္တဘယ်နှစ်ပတ် ကျွန်တော် ပျောက်ဆုံးနေဦးမလဲ…

မြန်မာရွှေ့ပြောင်းလုပ်သား (ထိုင်းနိုင်ငံ)

ပိုစတာ(၃)။

ချောက်ချားဖွယ်ရာ အခင်းအကျင်းနဲ့ ရိုးရာ အဆိပ်ခွက်

ယုံကြည်မှုကို ယုံကြည်မှုတွေနဲ့ အကြိမ်ကြိမ် သတ်ခဲ့သေခဲ့ပုံ

အယူသည်းခြင်း အစိမ်းတောက်တောက် ကြက်ခြေခတ်အမှတ်အသားများ

သွေးညှီနံ့တွေ ကျိန်စာတွေ အခိုးအငွေ့ကြားထဲက ယဇ်ပူဇော်ပွဲဗုံသံ

အရှိန်တငြီးငြီးမီးတောက်မီးလျှံတွေထဲ အသိဉာဏ်တွေ အဆုံးထိပြာကျနေခဲ့တယ်

မှော်ကလဲ့စား

နိုင်ဂျီးရီးယားမြေကို မစွန့်ခွာခင်လေး

ကျွန်မကို အတုအယောင် ဗူးဒူးအခမ်းအနားတစ်ခုဆီ ခေါ်သွားကြ

ကျွန်မရဲ့ လက်သည်းတွေကို လှီးဖြတ်

ကျွန်မရဲ့ ဆံပင်တွေကို နှုတ်ယူ

ကျွန်မရဲ့ အဝတ်အစားတွေကို စုတ်ဖြဲ

 မှော်မီးပုံကြီးက တဖျစ်ဖျစ်လောင်ကျွမ်းလို့

ကြက်အရှင်တစ်ကောင်၊ တစ္ဆေမျက်နှာဖုံး၊ ဓါးရှည်နှစ်လက်နဲ့ သစ်ကြားသီးတွေလည်းပါသေးရဲ့

ကျွန်မ သွေးပျက်မတတ်ကို ကြောက်ရွံ့မိတာပေါ့

ငါ့ ပွဲစားခတွေကိုသာ နင်အပြည့်အဝ မပေးခဲ့ရင်

နင့်ရဲ့ သေခြင်းတရားက ဆိုးဝါးစေရမယ်..

ဒါဟာ ညည ကျွန်မကိုခြောက်လှန့်ကုတ်ဖဲ့နေတဲ့ အိပ်မက်ဆိုးပါပဲ။

အီတလီမှာ ကျွန်မအတွက် အလုပ်ကောင်းကောင်းတစ်ခု ရစေရမယ်တဲ့

အခုတော့ ခွေးဝဲစားတစ်ကောင်လို ကျွန်မ ယောင်လည်လည်

သူတို့ကို ပေးရမယ့်ငွေလည်း ယူရို တစ်သောင်းနှစ်ထောင်ထက်ပိုမပေးနိုင်ခဲ့

သူတို့က အဖေ့ခြေထောက်တွေကို ရိုက်ချိုးပစ်ပြီး ကျွန်မကို ခြိမ်းခြောက်ကြ

ကျွန်မမှာ နောက်ထပ်ကြောက်ရွံ့စရာ ဘာမှ မရှိတော့ဘူး

ကျွန်မ သူ့ကို မှော်အတတ်နဲ့ လက်စားပြန်ချေမယ်..

(နိုင်ဂျီးရီးယားအမျိုးသမီး( အီတလီ မှ ပြင်သစ်)

ပိုစတာ(၄)။

အရှင်လတ်လတ်သေဆုံးခြင်း အသားမာတက် လက်ဖဝါးများနဲ့ စိတ်ခန္ဓာ

အသေးငယ်ဆုံး အသိမ်နုပ်ဆုံးအထိ ဘဝကိုကျုံ့ပေးထားရတော့

ကိုယ်တိုင်ဖြစ်တည်နေခြင်းအရှိတရား ဆို တာ တောင် မရှိတော့..

မနက်တစ်ခုလင်းလာတိုင်း  မျှော်လင့်ချက်တစ်ခု ချုပ်ချုပ်သွားခဲ့တယ်

အိမ်……၊ ဘယ်အရပ်မှာများ ရှိနေလိမ့်မလဲ…

ပိတ်ထားတဲ့ တံခါးတွေရဲ့နောက်မှာ အလွမ်းနဲ့ ဘဝက လောင်မီးကျခဲ့ပြီ..။

ပိတ်ထားတဲ့ တံခါးများရဲ့နောက်ကွယ်

တစ်ရက်မှာ ၂၄ နာရီလုံးလုံး အချိန်ပြည့် အစေခံပါ

အိမ်ရှင်မက ကျွန်မလှုပ်ရှားမှုတိုင်းကို မယုံသင်္ကာနဲ့စောင့်ကြည့်လို့

ကျွန်မကို သူခိုးမလို့ စွပ်စွဲလို စွပ်စွဲ

 ရိုက်မောင်းပုတ်မောင်းလုပ်တာလည်း အကြိမ်ကြိမ်အခါခါပေါ့

စားစရာ တစ်ဆုပ်တစ်ခဲနဲ့ ဆာလောင်မွတ်သိပ်လွန်းလှတဲ့ ညတွေလည်း မရေတွက်နိုင်ခဲ့

ကျွန်မ ဖုန်းမသုံးရ ၊ ကျွန်မ အိမ် အပြင်မထွက်ရ

ကျွန်မ အတွက် ကန့်သတ်ချက် နံပါတ်စဉ်တွေက များပြားလွန်း

ကျွန်မရဲ့ရပိုင်ခွင့်ကတော့ တစ်နေ့မှာ ဆင့်၅၀

အိမ်ရှင်က ကျန်တဲ့ ပိုက်ဆံတွေ နင့်အိမ်ကိုပို့ပေးမှာပါတဲ့

မဟုတ်ဘူး…

အဲဒါ သူတို့ လိမ်နေတာ

ကျွန်မဟာ သူတို့ရဲ့ ကျွန်သဘောက်သက်သက် အစေခံမျှသာ..

(အိန္ဒိယအမျိုးသမီး( ဒူဘိုင်း)

ပိုစတာ(၅) ။

ဒီအလင်းအစက်အပျောက်လောက်နဲ့ မိုးမသောက်နိုင်ခဲ့ဘူး

ဒီထက် မှောင်စရာမရှိတော့တဲ့ အဆုံး အနက်ထည်အတိုင်းနေမိတယ်

နေ့တွေ ညတွေရဲ့ အနံ့နဲ့ တစ်ဘဝလုံးလုံးမူးဝေအော့အန်လို့

ကိုယ့်ကိုယ်ကို သွန်ပစ်လိုက်ချင်တဲ့ ရွှေညိုရောင် အရယ် အပြုံး အကျိ အချွဲများ…..

အား…………..!!!

အဖြူရောင်စစ်စစ်ဖြစ်ဖို့အတွက် အသက်ကို အသစ်ကပြန်စလိုက်ချင်ပြီ..။

တစ်စုံတစ်ဦး ရဲ့အမေ ၊ နှမ၊ သမီး

သူလိုလူ သူတစ်ယောက်ပဲရှိမယ်ထင်မိရဲ့

ကျွန်မရဲ့ လူသေလိုမျက်နှာထဲက မျက်လုံးအစုံထဲက

သူ ဘာကိုရှာဖွေတွေ့ရှိသွားခဲ့လဲ..

ကျွန်မဆီမှာ လိပ်စာကဒ်ပြားတစ်ခုနဲ့ မင်းကိုငါ ကူညီမယ်ဆိုတဲ့ စကားတစ်ခွန်း

ကျွန်မကို လက်ဖျားနဲ့တောင် တိုးထိမသွားတဲ့သူ..

သူလိုလူ သူတစ်ယောက်ပဲရှိမယ်ထင်မိရဲ့..

ကျွန်မဟာ နာကျင်မှုထဲမှာ ကျိုးပဲ့ကြေမွနေခဲ့သူ

ကျွန်မဟာ သိမ်ငယ်မှုနဲ့ ဆွံအလှောင်ပိတ်နေခဲ့သူ

ကျွန်မ အလိုမတူတာတွေက ကျွန်မကို စုပ်ယူလုံးထွေး

ကျွန်မကိုယ်ကျွန်မ မသဒီတော့တဲ့ အညစ်အကြေးတွေ

ဒါကို သူမြင်သွားလိမ့်မယ်..

ရှင့်ကို ကျွန်မကျေးဇူးတင်ပေမယ့်

ကျွန်မ ဘယ်လို ရုန်းထွက်ရဲပါ့မလဲ..

သူတို့ ကျွန်မကို အပြီးတိုင် ချိုးချေခဲ့ပြီးပြီ…

သူတို့ ကျွန်မဖြစ်တည်မှုတိုင်းကို တင်းတင်းကြပ်ကြပ်ဆုတ်ကိုင်ထားပြီးပြီ..

ကျွန်မကိုယ် ကျွန်မ..

 တစ်စစီလိုက်ကောက်ခွင့်ဆို..တာ……….

(ဘူလ်ဂေးရီးယားအမျိုးသမီး(ပြင်သစ်)

+++

ကဗျာဆရာ ချရေးမထားတာတွေကိုလည်း ရှင်တို့ ကြားလိုက်မယ်ထင်မိရဲ့

အဲဒါ ခေတ်သစ်ကျွန်ဇာတ်အသွင်းခံထားရတဲ့ လူသားသန်း(၃၀)ဆီက အသံတွေ..။        ။

အိန္ဒြာ

၂၀.၁၀.၂၀၁၃

Singaporeနိုင်ငံ Central Plaza   နောက်ဘက် မြစ်ကမ်းနံဘေးရှိ 

 Bought and Sold ( Voice of Human Trafficking ) ခေါင်းစဉ်နှင့် ခင်းကျင်းပသထားသည့် ပိုစတာများမှ ရသောကဗျာ။   

အိုင်ဒီယာမဂ္ဂဇင်း

၂၀၁၄၊ ဇန်နဝါရီ